• إنشاء حساب جديد
    *
    *
    *
    *
    *
    لا بد من تعبئة الحقول التي تقابلها العلامة (*) .
أنت متواجد في: Home شعر وزجل همسة وطلبية

همسة وطلبية

أرسل إلى صديق طباعة PDF

 

مع شروق الشمس

مع أول الخيوط الذهبية

بعد ما خلصوا شغل

عمال البلدية

همست الوردة الجورية

بإدن الياسمينة الدمشقية

اليوم بالليل رح ينقلوني

من حدك بالساحة الأموية

هيدا أخر يوم لألنا مع بعض

تحت شمس الحرية

تذكريني كل صباح

لما بتفتح الإذاعة السورية

بالنشيد السوري

وبالقرآن الكريم

وبعدها مباشرة

بالغنية الفيروزية

خبريني مين بيدخل

عا مبنى التلفزيون

عالمحطة الأرضية

وعالمحطة الفضائية

بعتيلي أخبارك

مع أول نحلة برية

أنا خايفة كتير

أنا خايفة تكون

أخرتي بمزهرية

أو يقدموني

لشي سفارة أجنبية

ياخدوني لبلاد غريبة هدية

خيتي الأكبر مني

قطفوها عشاق الحرية

بيوم تجمعوا تأييداً

للأسد رئيس الجمهورية

رفعوها عالي

مع العلم السوري

رمز الوحدة الوطنية

يا ريت كانوا دعسوني

هيديك العصرية

لموت موتة هنية

بأرضي

أرض سورية الأبية


بليلة قمرية

قرأوا الفاتحة عليي

ما قطفوني

ما قلعوني

مع تراب الشام حملوني

عاباب الجامع الأموي نطّروني

من الجامع شوية رماد من مبخرة حطولي

رجعوا بالشارع المستقيم أخدوني

عكنيسة حنانيا تحت الأرض نزلوني

ميي مقدسة من نبع الفيجة سقوني

بي شارع المالكي غنية موطني سمعوني

بالقصر الجمهوري وين نهايتي خبروني

يا وردي جوريي أختك استشهدت

رح تكوني قربها

رح يزرعك حافظ ابن رئيس الجمهورية

بإيدو قرب قبر الجندي المجهول

قرب إختك الكبيرة بي هالليلة القدرية


بمنتصف الليل

بأرضي

أرض الشام تاني مرة رجعوا زروعني

أول صباحية لألي

يا ربي شو هالطلي البهية

يا ربي الشام مش جنة أرضية

يا ربي الشام مش بوابة التاريخ

الشام هيي تاريخ الإنسانية

الشام هيي الأديان السماوية

الشام هيي أمل البشرية


عند الضهرية

نحلة ريحتها ذكية

خبرتني خبرية

من جارتي الياسمينة الدمشقية

وطلبت مني طلبية

اشمخي

اشمخي

اشمخي

خلي راسك لفوق

خلي ريحتك لفوق

للحياة الأبدية

للأبدية السورية

لأن

دمشق هيي البوابة الأرضية

دمشق هيي البوابة السماوية

هيدي ديانة الياسمين

والورد الجوري

هيدي قصة الإسلام والمسيحية

بالشام السرمدية أنا كاهن الرعية


ميشال الياس

16\12\2011

 

إضافة تعليق


رمز التحقق
تحديث