|
يا رب رجعني ع َ ضيعتنا تَ شوف أمي وشوف حارتنا وتَ شوف خيي وشق عالبستان واصلي الدبق عَ غصون تينتنا وإصحى الصبح مع صحوة الرعيان ودوري معشعش فوق طاقتنا
إشرب القهوة وصبّح الجيران وفرفط بإيدي وراق حبقتنا وأمشي أنا ومجوز بهالوديان نرافق النسمة وعطر فيتنا نصحي الفجر عَ أعذب الألحان ونطبع النهدة بخد مرجتنا واسمع قبل ما تغيب بالنسيان ردات عيسى تحت دالتنا وقصة القيمة وزند بو شيبان وعتبة البيت وعقد قبوتنا ومقلع الوادي ومخل بيت سلمان ونصبة الفخ بباب صيرتنا ورد الجبيلي يوم بو سمعان غنى العتابا تحت خيمتنا نتذكر السهرة على الصيوان وكيف كانت بنت جارتنا يوم اللي عشقت عمنّا مروان وبيّا منعها تزور عمّتنا من بعد مَ تملي مع النسوان تكسر الجرة قبال نبعتنا وترجع لحالا بأغلب الأحيان تَ تشوف عمي تحت حورتنا وتحكيلنا شي عَ وقت اللكان موسم القز عماد عيشتنا وكيف جدي تاكلو الأحزان وقت اللي يسمع رقم دينتنا ومن بعد ما تشيح على الريحان وتاكل القزي وراق توتتنا يمشي معرم صوب هالدكان ويسقي الفرح من نبع كركتنا وإن كان ياربي مافي إمكان إرجع وشوف تراب ديرتنا بعتلي فراشة بجناحا علقان غبرة حفافي كروم تلتنا وإن ما قبلت تبعت حجل بقيان عَ جوانحو ترابات حقلتنا بعتلي شي نسمة تايهة بنيسان يمكن ياربي تكون بالصدفة بتعرف شي نسمة فوق ضيعتنا
|
